Oh Parmi beddha!

Oh Parmi beddha

Quanti ‘nnamurati  eppi stà nostrha terra

Occhi ‘lluminati pe la so meraviggha

Grazia rricevuta di grandi beddhizzi,

rrobbata  ogni pintuni pe li so fattizzi.

Nuddhu seppi offriri  e mai esprimiri

 li so profumi e li so splendidi  culuri  

né cu paroli e né cu singhi  nnamurati

sepparu rrobbari i so spettaculi  pittati.

Ti inchi l’occhi e ti faci commoviri,

diventa ntutt’unu cu lu cielu e  lu mari

quandu lu suli cala ti chiama all ’amuri

e  t’arricorda ill’esistenza du Signuri.

Milli viduti s’apprisentanu pe nui

e ogni jornu diventa ‘na terra nova

Nta tuttu u mundu si disiata, oh Parmi beddha

i cu canusci  bbonu u to Sant’Ulia e a to Luvareddha

Nà sposa duci si teni strittu lu so sposu

e addhumatu  lu so grandi  amuri  teni 

 Cu tantu garbu e cu li so beddhizzi

su teni strittu a iddha cu li so carizzi

  

A nostra Parmi ndi teni stritti cu li stessi armi,  

comu dda sposa, si rrobba lu nostru cori

‘Ndì mmostra  li sò bellizzi  e  li sò culuri

ndi ‘ncensa cu na’ curuna i profumati jhuri.

Non potarria campari senza la Parmi mia

senza mi m’inchiu l’occhi di li so sfumaturi.

Quandu passu ill’autra parti jeu volarria

spargiri a me simenza supra a sta terra mia

Comu rregalu a iddha e pò so amuri

mi volarria donari comu omaggiu du Signuri.

Loredana Idà       25 maggio 2012

LOID